ჟაკლინ კენედი ონასისი

 აშშ-ს ყოფილი  პირველი ლედი, ჟაკლინ (ჯეკი) ბუვიე კენედი ონასისი   რჩება ისტორიის ერთ-ერთ ყველაზე საკულტო ფიგურად. დაიბადა 1929 წლის 28 ივლისს, ნიუ-იორკში. ჯეკი ყოველთვის წარმოადგენდა საკუთარ თავს, როგორც ღირსეულ, გაწონასწორებულ და ელეგანტურ ქალს. თუმცა  ბევრმა არ იცის, რომ მას  ოჯახური დრამებით სავსე ცხოვრება ჰქონდა. როგორც ცნობილია, ჟაკლინის მშობლები ერთმანეთს დაქორწინებიდან მალევე დაშორდნენ, რადგან  მამა აზარტული თამაშების მოყვარული, ალკოჰოლიკი და მექალთანე იყო. მშობლების განქორწინებამ ახალგაზრდა გოგონაზე დიდი გავლენა იქონია. 

 1947 წელს ჯეკი ჩაირიცხა ვასარის უნივერსიტეტში და სწავლობდა საზღვარგარეთ საფრანგეთში. მოგვიანებით   გადავიდა ჯორჯ ვაშინგტონის უნივერსიტეტში, რომელიც დაამთავრა 1951 წელს და  მიიღო ბაკალავრის ხარისხი ფრანგულ ლიტერატურაში. პირველ ლედის ქორწინებამდე პერსპექტიული კარიერა ჰქონდა, როგორც რეპორტიორსა და ფოტოგრაფს. Vogue-ის თანახმად, ჯეკიმ გაიმარჯვა პუბლიკაციების Prix de Paris-ის ესეების კონკურსში და 1279 კანდიდატიდან აირჩიეს უმცროს რედაქტორად, როდესაც ის მხოლოდ 21 წლის იყო.

 წყვილი 1953 წლის 12 სექტემბერს დაქორწინდა. ცნობილია, რომ მათი ქორწინება მღელვარებით სავსე იყო, რასაც ჯონ კენედის სხვადასხვა ქალთან ურთიერთობას მიაწერენ. აღსანიშნავია, რომ ჯონ კენედის ჰქონდა უდიდესი პოლიტიკური ამბიციები, მას სურდა გამხდარიყო პრეზიდენტი და უყვარდა ყურადღების ცენტრში ყოფნა, ჟაკლინისგან განსხვავებით. ასევე, პირველ ლედის, სამწუხაროდ, ორსულობასთან დაკავშირებული პრობლემებიც ჰქონდა. მან შეიტყო, რომ ბავშვის გაჩენა მისთვის ყოველთვის რთული იქნებოდა. ამგვარად, პირველი ორი ორსულობა ტრაგიკულად დამთავრდა.  ამის შემდეგ წყვილს გოგონა, სახელად ქეროლაინი და  ვაჟი, ჯონ ფ.კენედი უმცროსი შეეძინათ.

 ჯეკის ერთ-ერთი ყველაზე ხანგრძლივი აქტიური საქმიანობა თეთრ სახლს უკავშირდება. მისი ინიციატივით შენობას  1961  წელს მასიური რემონტი ჩაუტარდა. პირველი ლედის მთავარი მიზანი თეთრი სახლის ისტორიული მთლიანობის შენარჩუნება იყო. მან დაარსა სახვითი ხელოვნების კომიტეტი და  თეთრი სახლის ისტორიული ასოციაცია - არაკომერციული ორგანიზაცია, რომელიც ეხმარებოდა შეძენა-შენარჩუნების მცდელობებს. შედეგად გაფართოვდა თეთრი სახლის კოლექცია, დეკორატიული ნივთებით თუ წარსული ადმინისტრაციების ისტორიულ ნამუშევრებით. 

 ჯეკი კენედის  ხშირად აქებდნენ  მისი  ელეგანტური და ევროპული სტილის გამო, რაზეც დიდი გავლენა საფრანგეთში ცხოვრებამ მოახდინა. პირველმა ლედიმ არაერთ მოდურ ტენდენციას დაუდო სათავე; ხელი შეუწყო: ქუდების, იდაყვის სიგრძის  ხელთათმანების, თავსაბურების პოპულარიზაციას. თუკი ტანსაცმელზე არსებული დანახარჯებით ვიმსჯელებთ, ჟაკლინს შოპინგი ძალიან უყვარდა. ცნობილია, რომ  მან თანამდებობის პირველ წელს გარდერობში $45,446 მეტი დახარჯა.

 ჯონ კენედის მკვლელობიდან 5 წლის  შემდეგ, 1968 წლის ოქტომბერში, ჟაკლინი მეორედ დაქორწინდა ცნობილ ბერძენ ბიზნესმენ არისტოტელე ონასისზე. ეს ქორწინება შოკი იყო ამერიკული საზოგადოებისთვის, რადგან აშშ-ს პრეზიდენტის მკვლელობიდან არც თუ ისე დიდი დრო იყო გასული. ამასთანავე, წყვილს შორის ასაკობრივი სხვაობა 23 წელი იყო და ხალხის აზრით მათ არაფერი ჰქონდათ საერთო. გაჩნდა მოსაზრება, რომ ჯეკ კენედის სტაბილურობა და მდიდრული ცხოვრება სურდა, თუმცა იგი აცხადებდა, რომ ჯონის მკვლელობა ნიშნავდა კენედის ოჯახზე მუქარას, რის გამოც მისი შვილები უსაფრთხოდ არ იყვნენ და უნდოდა ძველი კავშირებისგან სრულიად გაცლა. 

 არისტოტელე ონასისი ქორწინებიდან მალევე, 1975 წლის მარტში გარდაიცვალა. მეუღლის გარდაცვალების შემდეგ ჟაკლინი ძველ საქმიანობას დაუბრუნდა და მუშაობა რედაქტორად განაგრძო. გამოსცა არაერთი წიგნი თუ თარგმანი. მიუხედავად იმისა, რომ ქმრის გარდაცვალების შემდეგ თეთრი სახლი დატოვა, ჟაკლინ კენედი ონასისმა მთელი ცხოვრება შეინარჩუნა ინტერესი პოლიტიკისადმი.

    ავტორი: მარიამ ხინიკაძე

 რედაქტორი: დავით მაჭავარიანი

31.03.2023