ჯევროლუცია აახლებს აქტივობებს ფიზიკურ სივრცეში. გაზაფხულის პირველი თვე ქალთა თვის სახელითაა ცნობილი, შესაბამისად, ლიტერატურული პროექტის ფარგლებში მიმდინარე კვირეულის თემაა "ქალები ლიტერატურაში". 

 თემატური სტატიების გამოქვეყნების შემდეგ კვირეული კონფერენციით დასრულდა. 25 მარტს ჯევროლუციის წევრები სკოლა-ლიცეუმ “პრომეთეს” ეწვივნენ, სადაც IX და X კლასების მონაწილეობით ჩატარდა კონფერენცია თემაზე "ქალთა სახეები ლიტერატურაში". ღონისძიება მიზნად ისახავდა ძლიერი ქალი პერსონაჟების პოპულარიზაციასა და მოსწავლეებში კითხვის წახალისებას. 

  კონფერენციის პირველ ნაწილში მოწვეული მომხსენებლები გახლდნენ ახალი თაობისთვის საყვარელი "ბუქტოკეტერები" - ნინა ჯორჯაძე და ქეთო სიხარულიძე, რომლებმაც მოსწავლეებს წარუდგინეს შერჩეული ლიტერატურა, რომელშიც ნათლად იკვეთება ქალის ძლიერი, მტკიცე და უდრეკი ხასიათი:  ჯეინ ოსტინის საკულტო ნაწარმოები “სიამაყე და ცრურწმენა” და თანამედროვე ქართველი ავტორის, ანა კორძაია-სამადაშვილის წიგნი “ვინ მოკლა ჩაიკა”. 

 კონფერენციის მეორე ნაწილი დაეთმო მოსწავლეების პრეზენტაციებს. მოზარდებმა ისაუბრეს გამორჩეულ და დასამახსოვრებელ ქალ პერსონაჟებზე, როგორც ქართულ, ისე უცხოურ ლიტერატურაში. აღსანიშნავია, რომ მოსწავლეებში დიდი ინტერესი გამოიწვია აღნიშნულმა თემატიკამ და ორივე სქესის წარმომადგენლები აქტიურად ჩაერთნენ ქალი პერსონაჟების შერჩევასა და დახასიათებაში.

კონფერენციის ბოლოს ჟიურიმ გამოავლინა 3 საუკეთესო პრეზენტატორი, - მარიამ ბოლაშვილი, ლიზი ესიავა, ნინი კაპანაძე, - რომელთაც გადაეცათ მომხსენებლებისგან რეკომენდებული წიგნები, კონფერენციაში მონაწილე თითოეულ მოსწავლეს კი გადაეცა ჯევროლუციის სერტიფიკატი და სპეციალური ჯილდო პროექტის მხარდამჭერისგან - გრიფინის პოლიგლოტთა აკადემიის ვაუჩერები.

ორგანიზაციის სახელით მადლობას ვუხდით მოსწავლეებს ჩართულობისთვის, სკოლის დირექტორს - ქალბატონ ნატალია ბეიტრიშვილს და მომხსენებლებს - ქეთო სიხარულიძესა და ნინა ჯორჯაძეს თანამშრომლობისთვის.

ღონისძიების ორგანიზატორები:

ბარბარე ხურციძე

ანა ჯიჯავაძე

მარიამ ექვთიმიშვილი